ملاحظه ربما ليست هذه العادات مع البلوش اصبح الحين يقلدوا البلوش مثل التجليس وما شبه ذلك بس اصلها بلوشي..اول تخبرنا جدتنا انه كانوا يضحكوا على البلوش بهذه العادات بس الحين بعد اختلاط القبايل يعني بنت تتزوج قبيله ثانيه تاخذ معها العادات.. وربما انتشرت في المنطقه التي نعيش فيها.,.
والحين بعض البلوش في بعض مناطق مسقط مثل العامرات وولايه مسقط حذفوا هذه العادات ويختصروها في القاعات والفنادق بس احنه ما زلنا على عاداتنا والحمد لله..
في بعض الاشياء راح اذكرها بصفه عامه عن عادات مسقط وخاصه عن عادات البلوش
حيـــــــاكم الله
الخطبه ::
يكون بين اهل العروس والمعرس يكون اهل العروس يحددوا كم مهر بنتهم ويكون في مسقط ما يكثر عن 5000 واكثرهم يحدوا للبناتهم 3700 طبعا 200 ريال للخادمه الي ترابع العروس الى بيتها وتجلس معها علشان تطبخ لهااااااااااااا
""
كان اول تجلس العروس اسبوع ما تطلع برع تتسقبل الخادمه الضيوف وتقدم لهم الفواله بس الحين اصبح انه العروس تطلع بسرعه مثل السفر او يروحوا يتمشوا في مناطق السلطنه.....
الحـــــــق""تسليم المهر..
بعد ارضاء الطرفين وتحديد كل ما يطلبه اهل العروس وموافقة اهل المعرس يذهب اهل المعرس الى السوق لشراء الاغراض للعروس مثل الذهب
""الدبله
العقد
الساعه
هذا اهم شي وهدايا فرعيه تكون من اهله ..,,وشراء المندوس المطور للوضع الهدايا من ملابس والمكياج
والعطور وووووووووو...
ويوضع الاغراض العروس في بيت المعرس وتقوم ام المعرس باخبار صديقاتها ومعارفها لدعوتهم للرؤية المشترى""يعني اذا كان اسبوع القادم تسليم المشترى فأم المعرس تخبرهن قبل باسبوع""وفي الاسبوع الي يسلم فيه المهر يحضرن الحريم ويدورن بالهدايا الى حين يعلن رحيل الحق..
بس اذا كان المعرس مالك قبل عن يسلم يقدم لعروس نصف المبلغ بس اذا ما مالك ياخذ مع الحق.
اكثر شي يكون في يوم الخميس تقام حفله اشهاريه للاستلام اهل العروس المهر ووجبة العشاء على اهل المعرس في بعض الاحيان...وفي تلك الحفله يبدا اول شي اهل المعرس باخراج المبلغ واشهاده مثل المناده على الناس ومن ثم هدايا المعرس من الساعه ودبله والعقد وثم هدايا اهله وبعد الانتهاء يبدا هدايا اهل العروس من اهلها جميعا""...بعد الانتهاء تضيف اهل العروس اهل المعرس...
الملكه...
بعد انتهاء المعرس من مراسيم الملكه ويكون اهل المعرس في التجهيز الى الذهاب الى بيت العروس وقد جهزت للمعرس سله بها ورود وبداخلها شمعه والمقصود من ذلك باطفاء شمعه اعلان انتهاء مرحله العزوبيه ودخول قفص الذهبي""هذه الحركه احنه مسوينها ما مال البلوش بس عادي يقلدوناهههههه""
...بعد ذلك الذهاب الى بيت العروس ويقوم المعرس بوضع يده فوق راس العروس ويدعي..
وبعد ذلك بازاله الغطاء او الطرحه وتكون العروس بلبسها العماني او البلوشي...وتبدا بعدها المباركه والحفله بين الاهل...
لما ملكه اخوي بعد ما ملك كنا على نار نتظر اخوي يوصل لما وصل فرحنا له وكنا حاطين سله كبيره فيها ورود وشمعه على شكل حب وخليناه يطفئ العزوبيه..ويبدا في حياته الزوجيه ويهتم بزوجته ومستقبله في الحياه..وبعدها رحنا بيت العروس..
اول شي دخلنا اخوي في غرفة الجلوس بيت العروس بس ما شفنا العروس هناك خبرونا انه بيزفوها رحنا وزفيناها الين ما جلسناها جنب اخوي وكانت متغشيه وبعدها عم الصمت في الغرفه لانه كان اخوي مخلي يده فوق راس زوجته وجلس يدعي من خلص باركنا لهم وجلسنا ناكل الكيك ورقص وضحك والحمد لله..
اسبووووووووووووع العرس
السبت
يوم السبت وهو بتجهيز الملابس وتزين المنزل وتجمع الاهل والجيران...
طبعا احنه كان العرس بعد الاعصار يعني نهايه شهر 6 وكنا نظف البيت ونظف بيت اخوي وتعبنا واااااايد الين ما نخلص وما شاء الله الشباب الحاره ساعدوا على التنظيف وترتيب من قدام بتنا والحمد لله..
الاحــــــــــــد
يـــــــــوم يعلن فيه تجليس العروس وعدم خروجها من المنزل ولا يسمح لها برؤيته زوجها هههه ويبدا تجليسها وقت الصبح كان سابقا في وقت الصبح اما الان وقت الليل بتجمع الاهل والجيران وقد يعتمد على اهل العروس في اخبار الاهل والجيران حكم المناسبه معهم انه ام العروس تقوم باخبار عن هذه المناسبه....وتبدا المراة سمرا بتحضير الدهن للعروس ويسمى ""الصندل البلوش"" الصندل حلو وايد ما شاء الله يتفنن فيه ويخف الحبوب من الوجه ويمص الاوساخ من اعلى بشرة العروس""بس الحين حتى احنه نستخدمه صحي هههه""...في حين تجمع النساء والاهل يبدا زف العروس من غرفتها الى غرفة الجلوس بمنزلها او العكس صحيح..وبعد تجليسها اي وضعها على الكرسي وتقوم 6 نساء بدهن الصندل وشرط تكون متزوجه يعني رحنا فيهاااااااااااا...
وبعدها النساء الاخريات بطرح الفلوس ""العشرات فوق العروس والمباركه لهااااااااا...ومن ذلك اليوم لا تخرج العروس ولا تطبخ ولا تمسك اي شي فتصبح مثل الملكه تاتي معها صديقاتها للمباركه لها وتخرج فقط للذهاب للاهتمام بظهرها..
الاثنين
يجهز اهل المعرس والعروس الطرح لليوم الاربعاء وهيه مبالغ وتزين منزل المعرس وغرفته المعرس مع الرقص طووووووول تلك الفترة"يعني الي وزنها واااايد تضعف في العرس ههههههههه
الثلاثاء
تذهب العروس واخواتها واخوات المعرس للذهاب الى الكوافير للتزين والنقش الحناء اما المعرس يذهب الى المحلات للشراء الخضروات والفواكه وكل ما يتطلبه من تكاليف العرس.
الاربعـــــــــــــــــاء
الاربعاء بمنزل المعرس والعروس ::
يتم تجهيز الكوشه تكون امام المنزل وتكون بطراز تراثي جميييييييل وامام الفرقه البلوشيه بس الي يحب احنه مانحب الفرق البلوشيه بحكم يتجمع عليها الشباب.....اما العروس تكون في الحوش..
طبعا في يوم الاربعاء بيت المعرس يتم تجهيز العشاء وعبارة عن وجبه خفيفه مثل الثريد او الهريس...مع العلم ان في المنزل العروس يكون وجبة العشاء على مصروفهم الخاص...
بعد الاذان العشاء وانتهاء المعزيم يبدا تجهيز المعرس من قبل رجال كبار ومتزوجين بتلبسه العمامه والسباعيه اوالشال والمقصود به الربطه التي تربط على الخنجر..ويكون مثل الملك اللهم لا حسد..تقوم احدى من اخواته الصغار بمسك سله بحجم كبير وتوضع فيها المبلغ وهيه تلبسه العروس وايضا اهل المعرس يقوموا بمسك كل واحد منهم التلبسه للعروس..اما المعرس يكون المبلغ حوالي 50ريال مئه مئه والعشرات 10ريلات...وبعدها يدخل المعرس بيت العروس وهو اخته اول شي ومن خلفه الاهل من الاكبر الى الاصغر ابتدا من الرجال الى النساء بعد ما ينتهي المعرس من تلبيس العروس الطرح يقف جنب العروس وينتظر جميع اهله على الانتهاء من الطرح وبعدها يعلنوا الخروج على اخر طفله ههههه ...بعد الخروج يذهب اهل المعرس ببيت المعرس بزف المعرس من المجلس الى الكوشه مع الاغاني القديمه وتتقدم احدى اخوات المعرس بمسك الحناء وبخلفها فتاتين صغار بمسك شموع وايضا خلفهن سله ورود بطرحها على المعرس وخلف الصغار اخوات المعرس او امه وعمته بمسك مشبه تهويت المعرس من الحر ويتوسطهن المعرس وخلفهم مجموعه من النساء والاهل...ويزف الى ان يجلس في الكوشه وبعدها تقوم احدى من اهل المعرس عمته او خالته او احدى من اقرابائه اهم متزوجه...ويبدا اول شي الرجال بالمباركه للمعرس ويكون المعرس ذو شخصيه كبيرة وكل الي ما متزوج يتحامقوا ويتمنوا يكونوا مكان المعرس طبعا يكون المعرس بجنبه خواته وبنات عايلته..ويبدا اصدقائه بطرح المبلغ له والضحك على المعرس ""حركات شباب""وبعدها يبدا دور النساء من الجيران وااهل والاخوات ويتم ذلك اليوم بسعاده والهناااااااااء...
احنه بحكم الاعصار فماشي كوشه كلها في البحر متكسرات هههههه بس ما شاء الله جاراتنا سون حركه حلوه في وقت العصر جابن طاقه كبيره خضراء ولفبها قدام بيتنا وطلعنا كرسي من البيت وزيننه بزينه حلوه وصار مثل الكوشه بس الكوشه تركبيها بالدرج بس احنه سويناها تحت مراعاه للعجايز ههههههههه..
اما عن السله كان انا ماسكتنها اختي الاصغر وحده فينى من الطرائف نحنه كلنا خواتي لابسين عماني كشخه بس شوفو الكشخه شو صار فيها ههههههههههههههه كلهم ركبو السيارات والحريم الغريبات فالباصات بقيت انا واختي الاكبر ما يلنا مكان هههههههههههه وانا الف وادور ما شفت الا السيلرات يتحركن عاد انا اضحك واصرخ نتظرونا ههههه راحت الكشخه لين ما ركبنا مع زوج بنت عمي فضيحه .....ولما وصلنا بيت العروسدزو اختي الاصغر اول شي تدخل كان فيه خوف تخيلن حريم وايدات في الحوش بيت العروس واختي واخوي اول شييدخلوالما دخلنا كانت وحده من خوات العروس حاطه اغنيه ماطرح الحناء للمعرس لما دخلنا عند الباب راح طفل صغير وشحط الواير ما المسجله واختي واخوي عادي قريب مايوصلو هههههه عند العروس...قالوا وقفوا لما وقفنا ضحكت بقوه على شكل اختي واخوي والحريم الي في الحوش ما عارفات ليش ضحكت والي ورانا اهلنا ما عارفات ايش السبب الي يضحكني ومن عرفن جلسن يضحكن عاد ان قدام المعرس علشان اصوره ما صور عاد خخخخخخخخخخخ حتى كانت العروس من شافتني ضحك جلست تضحك على شكل زوجها المهم لما طرح اخوي ابتليت اختي بالسله كبيره ايش تسوي .,.,.,
اما لما كنا زافينه كنا لما رجعنا من بيت العروس ريحنا شوي وجلس اخوي واخوالي والرجال في المجلس وبعدين جالت امي يالله نزفه كان اخوي بدون وطيه جالس في المجلس تخيلن زفيناه على باب المجلس جالي اول مرة اشوف معرس بدون وطيه وجلسنا نضحك انا واختي الاصغر مني وكان الحريم يحسبنا نضحك عادي سوالف تضحكنا وما يحسبن اخوي بدون وطيه ناسيات عمارهن في الغناء ومن فوادهن يغنن وبعدين جلست ادور له وطيه ما شفت غير وطيت ولد خالي عاديه جالي انا ماخذ جديده دوريها جلت له ما يفيد بنوصل برع وانته بدون وطيه والحريم يزحفنا المهم لبسها لما جلس في الكرسي طلعوا الرجال جلس ولد خالي يدور وطيته مسكين وكان الرجال بادين يطرحوا يعني اذا ما طرح معهم بيكون فاته وبيجى دور الحريم وجلس يدور بنات اي وحده من اهلنا واحنه كلنا برع..انا بالصدفه كنت رايحه داخل شفته جالس لا يله ولا عليه جالي تعالي هذي وطيت اخوك اكيد هو لابس وطيتي ضحكت جلتله ايوا جالي روحي فسخيه جلت له فضيحه جدام الحريم جالي ما يلي خص ..ايش سويت حطيت الوطيه تحت الشال مالي وكاني سارقه شي وخليت عمري اريد اسولف مع اخوي وبالمخفي فسخته ولبسته وطيته هههههه...
*العروس تلبس عماني خضراء يوم الاربعاء واحنه نفس الشي بس اي لون عماني..
الخميس يالليله الخميس::
يوم الخميس طبعا اكيد اهل المعرس يقوموا من الصبح علشان يجهزوا الاغراض التجليس المعرس وهو يرتبوا الصاله ويوضع كرسي خاص لمعرس والصندل والمصر الاخضر ويغطى الكرسي بالشال الاخضر وبعد تجمع الاهل والجيران يبدا زف المعرس فقط يزف مع الحريم بدون الرجال!!
ويكون وسط اخواته او عماته او خلاته المهم من اهله كل وحده تمسك طرف من الشال ويفرع فوق المعرس ويزف من المجلس الى الصاله وبزفه حلوه وبعدها يجلس المعرس في الكرسي وتقوم 6 حريم متزوجات من اهل المعرس بدهن الصندل على وجهه اول شي تدهنه امه واخواته وبعدين عماته وخلاته وبعدها يربط على راسه المصر الاخضر ""مثل الصعيدي""....
اانا بالنسبه للعرس كان احلى يوم يوم الخميس كان اول شي تجمع كبير جدا بنات العايله الكريمه والكل متشوق للتجليس لانه من زمان محد تزوج من اولاد العايله..
انا كان اول مرة اشوف التجليس ولد خالتي بس كنا صغار في الابتدائي بس لما كان اخوي ضحكت والله من خاطري جدرت اشوف عليه شكله كأنه من باكستان وجهه اصفر وحالته حاله وعاجبنه الرجال عادي ""يجول بس ناقصني الساطور والذبيحه واروح عند الباكستاني الي يقطع اللحم""..
يجولوا في رقصه خاصه للبلوش وهيه ما توصف بصراحه انا لما عرفت عنها ضحكت على البنات لما يرقصن ويجولوا حتى الرجال يرقصوها..اخوي يعرف يقلدهم والله تضحك...بس ماعرف كيف اشرحها,,,
اتذكر
كنا حاضرين عرس وحده من اهلنا ويات بنت هيه صديقتي وجبرنها الحريم ترقص بلوشي ومسكينه على نياتها رقصة من خلصت مسكتها جلتلها ولما شفت على وجهها مسكت نفسي من الضحك وبينت لها اني متضايجه خبرتها بيني وبينك مرة ثانيه لا ترقصي بلوشي جالت ليش ضحكت وخبرتها والله انك لما ترقصي بلوشي كأنك طير يعلن هبوطه في الارض!!
جلست تضحك وتجول من ذاك اليوم ما رقصت!!
يعني يرفرفوا بأيدهم هههههههههه
بعد الاذان العصر تجهز السياره للعروس وتكون سياره المعرس جاهزة وتوصل بيت العروس بعد المغرب وكلها زينه وريحه البخور والعود هذي مهمتي فعرس اخوي ههههههه...وفي بعض الاماكن تقام زفه المعرس مثل ما ذكرت الاخت رياح عن عاداتهم زفة المالد**
بعد صلاة المغرب يجهز العشاء للمعازيم حتى الساعه 10 يضيفوهم اهل المعرس والعروس بالعلم ان وجبة العشاء على حساب المعرس بيت العروس يوم الخميس..وتكون قبولي بالحم يم يم ..
بعد تضيف الضيوف وتجهيز العروس وتكون بالبس المحبب لدى البلوش وهي البلوشيه وربما تكون من طراز الباكستاني المطور وايضا تتجهز الاخوات والاهل المعرس والعروس يذهب اهل المعرس الى العروس وطلب العروس من اهلها حتى يتم الموافقه""يعني عادات قديمه ملوغيه اكثر شي"" وبعدها تزف الى السيارة ووبعدها توصل الى بيتها وتدخل عشها الزوجي باحضان اهل زوجها وبوداع اهلها وانضمام الى اهل اخرين وتصبح حياتها بين اهل زوجها...
في بعض الاحيان تزف بيت اهل زوجها مثل ما سوينا احنه علشان الحريم يسون خطط ما لازم اجولهـــــــا
~*.ولما تدخل على زوجهـــــــــا.*~
*تصــــوب من سهم حبها
~مادام الروح تعشجها
*واحلى شي سويته
~تركت الجلب يخطبها
*مـدام ان الاهل ماشين
~على درب الستر والدين
*اكـــيد البنت والعومه وطيبــــات للطيبـن
طبعا احلى شي في العرايس يوم الخميس انه محد يشوف العروس بعد تزين ويكون زوجها اول شي يشوفها بالمكياج واللبس .. والاحلى لما تلبس اللبس البلوشي بس للاسف الحين بلوشيات يلبسن فساتين لواعه صراحه اكره شي اسمه فستان..في بنت ربيعتي زدجاليه ما شاء الله اللهم لا حسد عليها لما كانت متزوجه لا بسه بلوشي بتطريز باكستناني جميل جدا وانا الفكرة داخله بالي انه البنت حلو تلبس البلوشي فاول ليله اما الفستان مثل ما يجولوا اخواني راح نفصل كرفته وتجاكيت علشان الحريم لا بسات فساتين..
في بعض البلوش ما جرجر يسوا العكس يعني المعرس يزف بيت العروس مده معينه مثل ولد خالتي بس ما رضى ينام بيت اهلها راح في فندق بس لما وصلنا اول شي بيت اهل العروس خلوه هو والعروس في الكوشه ايش سوت عمتها جابت راس ولد خالتي وراس العروس طاحت عليهم تدقهم وتجول كلام بالبلوشي وتصهل من فوادها كللللللللوش ما فهمنا شي جلسنا نضحك على اشكالهم بس امي عصبة عليها لانه من فوادها تكرخبهم...لانه امه متوفيه وامي حسبت امه.....
سبحان الله
في صباح الجمعه او البعض في وقت العصر يبارك للمعاريس واهل المعاريس...
طبعا العصر رحنا نبارك لهم ويوم السبت راحوا شهر العسل الى..
مــــــــــاليزيا
والحين زوجته حامل دعواتكم انه تبكر ببنت ونسميها *نــــــــــور*
وانتهيـــــــــــــت من الموسوعه العريقه عن البلــــــــوش
Subject: عادات زواج البلوش 
Wed 28 May 2008, 6:20 am
